In su 1896, de accordu cun sos atteros poetes e cun Antoni Cubeddu de Uttieri, hana detzisu chi sas garas de poesia si devian fagher in su palcu e a chie 'inchiat li daian dae sa giuria unu premiu in dinari e no su premiu de sempre chi si naraiat "su pannu". Hat dadu puru unu contributu importante a s’ivviluppu de sa poesia sarda. Pro 20 annos e pius Gavinu est bistadu in tottus sos palcos de sa Sardigna fattende garas chi l’hana resu famosu in totta s’isola. Su ‘inu però li daiat problemas meda, sempre pius fortes cun s’edade. No cheriat però chi li neseren chi fit cottu e si bi lu naraian in su palcu ripondiat in rima. Cun sos silighesos invece la leaiat in modu divesciu ca bi lu naraian pro su bene sou. Isse riconnoschiat chi s’avversariu sou Pirastru haiat rejone cando li naraiat “chi su inu faghet male”. Ma si a su chi naraiat Pirastru ripondiat male, a su chi naraian sos silighesos sic’andaiat dae ‘idda e ripondiat cun ottavas chei custa: “A una limba mala…..” tantu tranquillas chi no pariat mancu sas suas. E no si podet mancu narrer cun zertesa ca primu sas poesias fin improvvisadas e tramandadas a boghe. Suzzediat meda bortas chi sas poesias si cambiaian raccontendelas e fini attribuidas a atteros poetes. In d’una soziedade de pastores su sardu si usaiat pius de s’italianu e sa poesia fit sempre fatta a boghe e no s’iscriaiat. custu suzzediat puru daboi de sa morte de su Poete suzzessa su 13 de triulas de su 1915. Sa poesia e s’istile sou sunu unu patrimoniu pro s’isola e pro sas generaziones de improvvisadores c'hana a bennere. Cun su divietu impostu dae su regime dae su 1932 a su 1939 ei sa ripresa a pattu de no faeddare de religione e de pulitiga, sas garas de poesia restan importantes finu a sos annos ’40, daboi cun su cambiamentu de sa cultura e de sa soziedade, perden de valore. Siligo no hat appidu pius unu poeta improvvisadore de s’alteza de custu fizzu sou; sos silighesos usaian sas poesias suas pro faeddare cun sos parentes de lontanu e calicunu lu faghet ancora. S’amministrazione comunale hat sempre cheffidu ammentare su Poeta pro lu fagher connoscher a sos giovanos de ‘idda e pro continuare sa tradizione de sas poesias in limba.
