Gonfalone de su Comune de Siligo

S’istemma de su Comune de Siligo seberadu dae sa Commissione Cultura e approvadu dae su Cossizzu cun delibera numeru barantotto de su vintotto de capidanni de su duamizzaeunu, est bistadu cunzessu cun su decretu de su Presidente de sa Repubblica s’undighi de ‘ennarzu de su duamizzaeduos.
In basciu b’est una corona subra una runda ‘e chercu e de laru e s’istemma est cumpostu tres partes: duas subra e una josso. In sa parte de subra b’hat unu liberu abertu pro ammentare sos personazzos illustres de Siligo in sa litteradura e in s’iscentzia, e unu mattulu de ispigas pro rappresentare sa printzipale attividade in Siligo chi est sa massaria. In basciu b’est sa cheja de Mesumundu.
Sutta ‘e s’iscudu, ind’un’istriscia celeste b’est iscrittu: SILIGUM DOCTRINA CELEBRAT. In su gonfalone, cund’una roba bianca e sos ricamos de prata, b’est s’istemma e s’iscritta de su Comune sempre de prata. Est mantesu dae unu fuste imboligadu cun d’unu fioccu de velluttu; b’est puru su nastru tricolore cun sos colores de sa Nazione nostra e sas frunzas de prata.